Friday, January 16, 2009

عواجيز الفرح بين الفضول والافتراض


يقف الجميع في انتظار مراسم الزفاف الدينية
تتقدم احداهم متسائلة : هو العريس فين ؟
السمراء : هذا هو العريس يقف هناك
تجيب : مش قادرة اشوف شكلة
تتعجب السمراء وتصمت
تسأل مجددا : هو فين اخوة
تجيب السمراء هذا هو الواقف هناك
تقول : دة اخوة الصغير ؟
السمراء : لا انه الأكبر
تبتعد السمراء وتتخذ جانبا من التساؤلات المتلاحقة وغير المبررة
تاتيها اخري معلقة : احنا مسمعناش عن الخطبة ، حصل ازاي ده
السمراء : ان كل شئ حدث في فترة وجيزة وسافر العريس الى البلد التي هاجر اليها
تبدا مراسم العرس والسمراء تراقب الاعين التي ازدادت اتساعا من الفضول
ومع نهاية المراسم الدينية تبدأ مراسم الحفل
وتبدأ معه أسئلة فضولية جديدة
ابنه العم : هو العريس هيخدها معاة على البلد العربي
السمراء : لا انه مهاجر الى احد الدول الغربية
ابنه العم : لكن احنا عرفنا انه في بلد عربي
السمراء : المعلومة خاطئة
ابنه العم : هو الفستان اللي لبساه العروسة مأجراه ولا شرياه
السمراء : اجرته لضيق الوقت
ابنه العم : بألف جنية
السمراء : لا اعتقد انه بضعف الثمن
ابنه العم : ياه غالي قوي
تصمت السمراء
تلتفت ابنه العم نحو الخالة وتقول : خالتك دي تكبرني الكثير
الخالة : ليه دة الفرق سنة واحدة بس
تعود ابنة العم لتقول : الحفلة دي متكلفة كثير ، يبدو ان العم قد تكلف الكثير
السمراء : تكلفة الحفل مقسمة بين العريس ووالد العروس
ابنه العم : يبقي اكيد دافع 10000 جنية نصيبه
السمراء : تقريبا تلك هي الحدود
ينادي احدهم السمراء ، تخيلت ان ذلك النداء هو خلاصها ، ذهبت مسرعة اليه ، ليسألها هي اللي واقفة معاك دي ابنه عمك ؟
السمراء : نعم هي
يسأل : هل مازالت على خلاف مع زوجها
السمراء : اعتقد ذلك
تتركه السمراء لتلتقي مع ابنة العم الثاني
ابنه العم : هل هذه والدة العريس ؟
السمراء : لا
ابنه العم : امال امه فين ؟
السمراء : انها مريضة تعيش في ذلك البلد الذي هاجر اليه ولم تستطع الحضور
تتقدم زوجة ابن العم : سمعت ان عندك امتحانات ، هو انت بتدرسي ايه ؟
السمراء : انها دراسات عليا
تجيب زوجة العم : آه انت متجوزة العلم بقي
تنفجر السمراء بالضحك محدثة نفسها
عواجيز الفرح بين الفضول والافتراض

12 comments:

حاول تفتكرنى said...

بعض الحركة عجز عن السكون
فالتفاعل ، والديناميكية والحوار والتجاذب وحتى الشجار والفضول قد يكون عجز عن الصمت

ربما كان كل ما سبق سلوكا طبيعيا لا يلحظه الآخرين ، وربما يندهشون إذا لاحظوا الدهشة فى أعيننا ، لان ما يدركونه انهم يسلكون سلوكا طبيعيا

ربما نملك من الدقة المتناهية حدا يجعلنا نقف كثيرا أمام جل الكلمات التى توجه إلينا فنفلسفها من خلال ما نعتقده نحن ، ونعيب على الاخرين التفوه بها ، وربما نتهمهم بالسطحية وتكون المشكلة من الاساس كامنة فينا نحن وفى قياسنا لكل أو جل ما يوجه إلينا

منذ ايام كنا فى حفل عشاء خاص بالعمل
قبل الحفل بساعة جائنى عشرات المكالمات تحمل اسئلة متنوعة ، عن الوقت وطبيعة الحفل وماذا نرتدي ومتى ينتهي وطبيعة الطعام ومكانة الحضور وعددهم ومدي علاقتهم بالعمل

وقبلها اتصلت بى زميلة فى العمل فى السابعة صباحا وكنت فى نوم عميق لتقول أن الطريق مغلق ماذا تفعل

طبعا الاجابة واحدة
معرفش
ولو كنت اعرف ما جاوبت اعتراضا على السؤال

يجب أن نعطي الاخرين مساحة عقلية ننزل بها إليهم
ليبقى كل مكنا مقتنع تماما أنه قال ما عنده

تحياتي

someone in life said...

سمراء

اولا مبروك و عقبالك
ثانيا الفضول و التساؤل و الاندهاش من تكوين الشخصيه المصريه الصميمه و احيانا بتزيد بالتدخل و دس الانف و ابداء الاراء الي اخره
بجانب حلقات النميمه و مصمصه الشفايف
و طبعا لازم عبدة فتاوي شغال و بيلف بفتواه علي كل واحد

تحياتي

احساس لسه حى said...

عزيزى

قبل ما نتكلم على مواقف غيرنا

نشوف احنا بنعمل ايه وساكتين على ايه

مدونة قطة الصحراء

فى عز ضرب حماس وغزه

والشهداء اللى بتبكى عليهم

بتقول

يبقى حماس والاخوان والجهاد إلى اسفل السافلين

ربنا ينتقم من الحمساوية ومن الاخوان ومن الجهاد

طبعا مفيش اسرائيل ولا امريكا

انا بعتبرها سافله وخايبه وبقول

ربنا ينتقم منها بدم الشهداء

حضرتك بتخش عندها وشايفها ايه

وبلاش نتكلم عن حكامنا وضعفهم

لانكم اضعف من حكامكم بسكتكم وترحبكم بالقذره دى

مستنى رائيك

وموقفك الواضح والحاسم

التدويين راى وموقف

مش صحبة ولمه وتبادل زيارات

بالذات فى موضوع خطير كده
وبلاش تقولى ده راى
دى عمالة وخيانة وقذراة وزبالة

وده لينك الموضوع


http://mshmuwafk.blogspot.com/


سلام

وميض ابتسامة said...

اعجبنى العنوان فهو يتفق والمضمون تماما
فما زلنا نرى فى افراحنا وغيرها من المناسبات هؤلاء الجالسين للسقطة واللقطة
ولكن هكذا كان حالنا وسيظل .. فنحن واقصد معظمنا يحب ان يكون على مستوى الحدث فلا تغفل عيناه ولا فكره عن سؤال ملح بداخله الا وذهب يبحث عن اجابة ..هل هو الفضول ؟ ربما !! وقد يكون اكثر من هذا

طبيب فقد الامل said...

السلام عليكم ورحمة الله وبركاته
اسمحى لى أن اقتحم مدونتك وأقدم لكى أعجاب ورثاء
أما الأعجاب فلاسلوب كتابتك التى تذكرنى بالدكتور يوسف ادريس
فى اسلوب استهجانه من الاخر
أما الرثاء فدة لكونك طالبة دراسات عليا اخترتى الطريق الصعب اللى ما بيأكلش عيش أسألى مجرب
اتمنى لكى التوفيق

Hannoda said...

كنت بتساءل بعد ردك عندي ان كنتي في الغربة ولا فمصر و عرفت

انها الحياه الاجتماعية
و الفضول
وأحيانا فراغ القلوب من الونس

ولا أعلم ما الذي قد يعزلنا عن أن نكون ضمن النسيج احيانا

هل هو امتلاء قلوبنا وزهدنا عن الغوص فيما لا يعنينا
أم هو الانعزال عن الحياه الاجتماعية التي يعيشونها هناك

هو التأجير و صل لألفين جنيه
أمال التفصيل بقى بكام!!!

آه ياني
:)

أتمنى لو حقا في الاجازة ان تسعدي بها بلا اي أفكار منغصة

Desert cat said...

الف مبروك وعقابلك يا سمسمة
هكذا حال المصريين فى جميع المناسبات التدخل فى شئون وخصوصيات الآخرين وهذا مسمى الفرح لديهم
مودتى واحترامى

mostafa rayan said...

لو كل واحد بطل يتدخل في شئون غيره كان الحال اتغير كتير
بس انتي كنتي لازم تصديهم من الاول قولي لهم ماعرفش بدخل مسؤال يجيب التاني
لك كل التحية

heba said...

عزيزتى سمراء

الف مبروك وعقبالك

انا معاكى فى رايك تماما
لكن تخيلى كدة ان الفرح تم على خير من غير عواجيز الفرح هتلاقنا احنا مسغربين جداا
دا وضع طبيعى وصعب جداااا انه يتغير

تحياتى وتقديرى

بيكر(baker) said...

اكيد امال انتى فاكرة الناس دى مفهومها ايه عن الفرح ناس بتستعرض و ناس بتتكلم عن الناس الى بتستعرض و اهى فلوس بتروح و خلاص
تحياتى و دمتى بخير

fashkool said...

ازيك يا سمراء
هل انت سمراء يا حلم الطفوله
ام سمراء بلون مياه النيل
اذا كنت هذه او ذاك فانت بلون ارضنا الطيبه
هذه اول زياره لمدونته الجميله وعواجيز الفرح وكثرة التساؤلات والنميمه فى الافراح
تحياتى يا سمراء

حازم سويلم said...

كلنا بشكل أو بأخر نشبه عجائز الفرح, مع عدم الأشتراط على الفرح كمكان