مكتب شؤون الطلبة بالجامعة

تدخل السمراء الى مكتب شؤون الطلبة بالمعهد
هناك 3 مكاتب يجلس عليهم الحاجة نزيهة - مدام سمية - والاستاذة فوقية
الحاجة نزيهه توجه كلامها الى مدام سمية : امبارح رحت التوحيد والنور دة عامل تخفيض على البطاطين اشتريت 2 بطانية بسعر واحدة
مدام سمية : كويس انك قلت لي دة انا عايزة اشتري النهاردة اعمل اذن واروح
في تلك الفترة تنسحب الاستاذة فوقية وتخرج من الحجرة
لم يلتف احد منهم للسمراء او حتي لاحد زملائها الذين يقفون امامهم
تبدأ السمراء : لو سمحت ياحاجة
لم يرد عليها احد
مدام سميه : على فكرة انا رحت كارفور واشتريت جمبري صيني دة حلو قوي ما تجربيه ياحاجة
السمراء مرة ثانية : السلام عليكم يا حاجة
الحاجة نزيهه : وعليكم السلام ورحمة الله وبركاته ايوة يا حبيبتي ( مع تعطيش التاء )؟
السمراء : كنت عايزة اسأل امتي ممكن اقدم لدراسة مجموعة المواد المقررة للفترة الدراسية القادمة؟
مدام سامية : دة عند الاستاذة فوقية
السمراء : اين الاستاذة فوقية ؟
مدام سامية : انها تؤدي فريضة الصلاة
تنتظر السمراء قدوم الاستاذة فوقية بينما تتابع الحاجة نزيهه ومدام سامية حديثهم
اخيرا وصلت الاستاذة فوقية
السمراء : حرما يا استاذة
الاستاذة فوقية : جمعيا يا بنتي ان شاء الله
في تلك الفترة تنسحب مدام سامية وتخرج من الحجرة
السمراء : ممكن اسأل امتي ممكن اقدم لدراسة مجموعة المواد المقررة للفترة الدراسية القادمة؟
الاستاذة فوقية : هو انت كتبت الطلب ؟
السمراء : لا
الاستاذة فوقية : خذي نموذج من مدام سامية وامليه
السمراء : هي فين مدام سامية ؟
الاستاذة فوقية : انها تؤدي فريضة الصلاة
تنتظر السمراء قدوم الاستاذة فوقية بينما يبدأ الحديث بين الحاجة نزيهه والاستاذة فوقية
الحاجة نزيهه : هي مرات ابنك هتولد امتي ؟
الاستاذة فوقية : بين لحظة والثانية دة شهرها
الحاجة نزيهه : ربنا يقومها بالسلامة أن شاء الله
عادة مدام سامية
السمراء : مدام سامية ممكن نموذج طلب التحاق ؟
في تلك الفترة تنسحب الحاجة نزيهه وتخرج من الحجرة
مدام سامية : هو انت ورقك جة من المجلس ؟
السمراء : مش عارفة
مدام سامية : بصي في الكشوف عند الحاجة نزيهه
السمراء : هي الحاجة فين ؟
مدام سامية : بتصلي
لم تتكلم السمراء وانتظرت لفترة طويلة ولم تحضر الحاجة
السمراء : مدام سامية هي الحاجة هتتأخر
مدام سامية : الحاجة مشيت اصل النهاردة شبكة ابنها عقبالك أن شاء الله تعالى لها بكرة

ملاحظة : الاسماء مستعارة