ذهبت السمراء لمشاهدة الشاشة الكبيرة
فيلم ليلة البيبي دول
وفي اليوم التالي فيلم كبارية
خرجت السمراء من المشاهدة ولديها إنطباع
أنه مجرد إنطباع وليس نقدا
موجة من الأفلام التي تدعوا إلى النظر إلى الأنسان كونه إنسان
تدعوا لاعمال العقل والتفكير
محايدة إلى حد ما بين الأطراف المتصارعة
تدعوا للتحاور وتخليص النفوس من الأحكام المتوارثة
دار بعقل السمراء تلك الأحداث التي صدافتها
والتي تجسد مشاعر دفينة متوارثة ويتم توريثها
السمراء تحاول الخروج من المكان الضيق الذي تركه أحدهم
بعد أن قام بصف سيارته موازيا لسيارتها
يتقدم أحدهم ويقول بنبرة حاسمة
اديني المفتاح وأنا أطلعها لك
اجابت السمراء بعجرفة
انا بعرف اسوق واعرف اطلعها
ولو مكنش هستني صاحب العربية
ثم كررت المحاولة حتي نجحت
تقدم مرة أخري نفس الشاب قائلا
انا قلت لك اطلعها لك علشان احنا مسيحيين زي بعض
تعجبت السمراء قائله
علشان احنا مسيحيين زي بعض اديك مفتاح عربيتي
ولا أنت مبتساعدش غير المسيحيين؟؟؟؟؟؟؟؟؟؟
وانطلقت دون انتظار ردود
إنها مشاعر دفينة متوارثة
في جلسة مع أطفال بين 3 : 5 سنوات من العمر
تجري السمراء حوار مع الأطفال حول الاختلاف في الشكل أو القدرات
تسأل الأطفال في حد هنا مش زينا شكلة غريب كلامه غريب ؟
يجيب جميع الأطفال بلا
رغم وجود احد الأطفال من ذوي الإعاقة
تكرر السؤال
يرفع الطفل الذي يتمتع بطلاقة لغوية أصبعه
تتيح السمراء الفرصة له للكلام
كلنا هنا زي بعض إلا النصارررررررررري
أندهشت السمراء وقالت
لية مالهم النصاري
اجاب معرفش هم مش زينا هم واليهود
سألت من الذي اخبرك بذلك؟
اجابها أنا سمعت دة في البيت والشارع وهنا في الحضانه
إنها مشاعر يتم توريثها
جزء من حوار فيلم ليلة البيبي دول
يعرض الأختلافات الكثيرة للبشر ويوحدهم تحت كلمة إنسان
وجملة في فيلم كبارية
تدعوا للإستماع والحوار
21 comments:
المواريث والافكار الجاهزة تقولب الانسان فى اطار الاستريوتيب
فيعيش ويموت كأنه ترس فى اله او بهيم فى قطيع
علشان احنا مسيحيين زي بعض اديك مفتاح عربيتي
ولا أنت مبتساعدش غير المسيحيين..عجبنى جدا ردك ومفيهوش احراج دائم للشخص يزعل شوية .بس يفوق من اللى حفظهولة فى مدارس الاحد .مجتمع غريب الاطوار انا اعرف شباب بتساوى ابداع فكر خلاق تمييز ..يعنى انا زى الشاب دة برضة اتكونت غلط بس كبرت وفكرت وحللت واستناتجت ..بغظنى اوى لما اكلم انسان ويقولى الدين بيقول كذا ..ماشى ياعم فوق دماغنا وانتا بقا بتقول اية ؟ يرد عليكى كدة ويبص من فوق لتحت ويقول انتا مبتفهمش الدينا بيقول كذا ..يابا انتا اية رايك طيب فى كلام الدين ..يقولك هو احنا هانئلف ..ايوة ساسيدى لية منئلفش هو مش ربنا عطينا عقل عشان نفهم ونميز .. تحياتى
سمراء
مدونتك جميلة قوي و عفوية اعجبني ايضا عملك مع ذوي الاعاقة ربنا يوفقك و يجازيكي فيه خير
موضوع الافكار الموروثه ده كبير قوي و فيه تخاريف كتير لكن المشكلة ان الاهل ليس عندهم توعية و بالتالي بينقل للاطفال و لا العدوى
تحياتي
:)
ليلة البيبى دول والدتى دخلته بس معجبهاش.. كباريه أخباره ايه؟
حلو مشهد طلوعك بالعربيه والمينى دايلوج اللى حطتيه
والمينى دايلوج التانى مع الأطفال.. أنا عمرى ماسألت على موضوع الديانه ده خالص.. باحكم على أى حد بعد تعاملى معاه ولفترة كافية
انا مش عارف احنا ليه كناس من ديانات مختلفة بنموت و نفصل بعضنا عن بعض يعنى فى الكليات تلاقى دول هنا و دول هنا ...... انا بس معترض على ان دة من تعاليم مدارس الاحد انا ماسك فصل مدارساحد و مش عايز اقولك احنا ازاى بنحاول نكلمهم عن ان احنا نعيش مع بعض و نحب كل الناس برغم الاختلافات و منها الاختلافات الدينية بس بجد الموضوع جميل كالعادة و ردك على الراجل بتاع العربية دة اجمد :]
وكأننا نبحث عن مصادر الإختلاف
بوست جميل
تحياتى
للاسف يا سماء بعض الناس بتربى اولادها على الحقد والكره
تعرفى انا عندى فى الجروب
على الفيسبوك
انسان محترم نشر حوار مع صديقه القبطى وفى النهاية اتفقوا على انهم انسان
للاسف بعض المعلقين كان ليهم راى مختلف
لكن علشان النقاش ميقلبش لمشكلة ويبقى فنى طائفيه فى الجروب كمان حذفت كل الردود المخالفة
تحياتى ليكى
عجبك فيلم ليلة البيبى دول؟ غريبه....بس بقية الكلام موافق عليه
واقع يزداد قبحا كل يوم ويطل برأسه فى تحدى
متواجد لكن بدون قدرة على التعليق
تحياتى
مرة كنت راكب ترام الرمل عندنا في اليكس
الترام زحمة موت ساعة الموظفين 2 الظهر
احنا قاعدين اربعة في الكرسي فجت واحدة طلبت تقف بيننا انا طبعا رفضت لانه مش منظر ثانيا انا مش هقعد مرتاح ثالثا كنت عامل جراحة في ظهري فماكنتش اقدر اقفلها
المهم ان كان قاعد قصادي انسة مسيحية وجهها ملائكي
الست اللي طلبت تقف بين الكرسيين دي برضه مسيحية بس مااخدتش بالي
المهم البنوتة قامت لها و سندت عالشباك التانية قعدت راحت موريالها صليب على ايديها و قالتلها احنا زي بعض
و الله يا سمراء انا مامتلكتش اعصابي و هات يا تهزيق في الست دي
و الجميل ان البنت كمان هزقتها و فاكر بالنص انها قالتلها اللي انتي و زيك بتعمليه ده هو اللي مكره الناس في بعضها
و الله الوطن ده جميل و ممكن يعيش فيه انشالله البوذيين حتى
و فيه ناس نفسهم جميلة بس فعلا في عالم دماغها معفنة هنا او هنا
تحياتي يا سمراء
يا مصرية
ليلة البيبي دول ام ليلة البوكسر
قريت مقاله بالعنوان ده قريب بينقد فيه الفيلم نقد شديد انه ضعيف البنيه دراميا وانه وصمة عار فى تاريخ الكاتب الكبير عبد الحي اديب
انا اسف انك دخلتيه قبل ما حد يحذرك
فيلم كباريه مقبلو نوعا ما
استمتعي بالافلام وابقي بعيدا عن مروجي الفتنه الطائفيه
تحياتي
عزيزتى سمراء
فى ناس كتيرة اوى كده قبل ما تعرف اسمك بتسال ان ديانتك ايه
واكيد ده غلط كبير انا بنى ادم وانت بنى ادم كل واحد فينا جواه شخصية وعقل هو ده اللى بيفرق
احلى حاجة فى الاطفال دلوقتى انهم بيفهموا كويس اوى وان ذوى الاحتياجات الخاصة ده عادى جدا وطبيعى
لان بقى الغريب ان الدين هو اللى مختلف
تصورى فكرتينى بحاجة ان مرة وانا لسه بشتغل فى المدرسة كنت بدى فصل المسيحيين هو فيه مسلمين كمان بس طبعا انتى عارفه انهم بيجمعوا المسيحيين فى فصل واحد عشان حصة الدين
لاحظت حاجة مهمه اوى بس دى كانت من الطرفين اولياء امور مسيحيين ومسلمين
انهم طول الوقت بيشجعوا اولادهم ازاى
بانهم يقولوهم لازم تذاكر عشان تبقوا احسن من المسحيين والعكس مع المسحيين
فعلا تقاليد ومواريث خاطئة
وسلام يا جميل
توارثنا افكار خاطئة ونورثها لابناؤناتفتكرى بلدنا مصيرها ايه واحنا اهلها مقسومين نصارى ومسلمين لطالما لم يفرق التاريخ بين مسيحى ومسلم طالما ابناء وطن واحد لما ننسى بطولات عيسى العوام فى مقاومة الحملات الصليبية الاجنبيةولنتذكر ايضا قائد عظيم مثل صلاح الدين كان ياخى بين المسيحى والمسلم فى جيشه ويراعى مشاعرهم اين نحن من هذا الزمن النبيل
انا شخصيا مسلمة وكنت اتناول الافطار مع جيرانى المسيحين فى اعيادهم حتى انهم ينتظرونى لنفطر سويا ونتبادل الحلوى فى رمضان
مدونتك رقيقة سمراء مثل صاحبتها دمتى بخير
عندك حق
افكار سخيفة نعلمها للاطفال كما تعلمناها نحن
متى يأتى اليوم ونتخلص منها للابد
عادات و موروثات متخلفة
احنا شعوب متخلفة حضاريا و ثقافيا ودا عادى
انا ونا فى ابتدائى كنا كل يوم ساعة مايضرب جرس المرواح نطلع نجرى بسرعة مارين بملعب المدرسة لغاية البوابة .. ولما واحد يكسب من فريقنا نفرح اوى او واحد يكسب من فرقتهم
احنا مين وهما مين ..؟؟
مسلمين ومسيحيين .. كنا عاملين فرقة مسلمين وفرقة مسيحيين ونتسابق كل يوم.. موش عارف ليه
بس للأمانة الاساتذة فى المدرسة ماكانش بيصدر منهم اى شئ يتعلق بالمواضيع دى
يمكن معظم موروثاتنا دى كانت بتجيلنا من البيوت والأسر
مسلم ومسيحي
أهلاوى و زملكاوى
فلاح وصعيدى وبحراوى
سمين و رفيع
ولد و بنت
غنى و فقير
دايما كنا بنقسم بعض بكل الصفات اللى مالهاش علاقة بقدراتنا وانسانيتنا
..........................
فى أمريكا يمكن رسميا ماعندهمش اى مظهر من مظاهر التفرقة العنصرية وابسطها ان خانة الديانة موش موجودة فى البطاقة
...............................
شعور قذر جدا .. سئ جدا جدا لما الاقى واحد معايا فى الشغل او فى دراسة ما يخدمنى او العكس ينفر منى بسبب انه صنفنى حسب ديانتى
تخلف تخلف تخلف
....................
بس الحمد لله بالنسبة لمصر احنا فى نعمة
ربنا يكون فى عون لبنان وكلنا عارفين قصة لبنان مع موضوع الطائفية والحرب اللى قعدت 15 سنة ولسه جذورها موجودة لحد دلوقتى
مسلم سنى
مسلم شيعى
درزى
مسيحي ارثوذكسى
مسيحى كاثوليكي
مسيحى مارونى
يهودى
...........................
بوست جميل يا سمراء .. انا لسه مادخلتش لى فيلم من الموسم الجديد .. لكن فعلا بدأت مستوى السينما عندنا فى الكام سنة الاخيرة تتحسن وكل موسم نلاقى افلام تستحق ان الواحد يدخلها وتخليه يفكر ويطلع من الفيلم بشحنة مشاعر
........
الحوار مع الأطفال مهم جدا وللأسف الطفل بيكون بين عالمين او تلاتة البيت والمدرسة والشارع.. ومن خلال معطيات التلاتة بيتكون فكره وشخصيته
.............
حلم حياتى ان اختيار المدرسين فى المدرسة يبقى اصعب اختيار ويتم بحرفية شديدة و بإمتحان قدرات وانتيرفيو .. ويبقى لهم دخل محترم يمنع تحولهم من معلمين الى تجار .. دخل يكفيهم
لانهم اصحاب اهم رسالة فى المجتمع .. او بمعنى اصح هما بناة المجتمع الحقيقيين
أعتقد أن الفرق ساشعا بين مورثات وموروثات
فحياتنا تبني على الموروثات حتى نستطيع أن نغرس فى أنفسنا موروثات نورثها
ولو آخذنا فى الاعتبار آراءنا حول مجموعة منها سنجد التباين سيتدرج لملايين الدرجات بين مستويين أثنين
ولكننا نستمر
أن الانسان استمر من الوف السنين
وسيستمر ، هكذا استنتجنا من البديهيات
أما عن كيفية استمراره فلن تعنينا كثيرا ، فهو - فى كل الاحوال - لن يستمر إلا مساحة صغيرة جدا جدا فى مسلسل الاستمرار البديهي
وربما تستمر تلك المستويات المتدرجة بعد أن تنتهي هذه الأجزاء ، ولكن دوائرنا الضيقة لا تشعر بكل هذه التعقيدات بين ما ما موروث وما يجب أن يكون
فدائرة نفسى لا تبالي ، ودائرة اسرتي لا تهتم كثيرا ودائرة عملي لا تلحظ تلك ، ومجتمعي ما0 هو إلأ مجموعة ناتجة لكل هذه الدوائر أيا كانت ، ،
تتحرك تلك الدوائر حركة لا نلحظها ، أو ربما على غير قصد منها كحركة الامعاء داخلنا أو عمليتي التنفس شهيقا وزفيرا عندما تتداخل مع بعضها البعض الدوائر ، وتسكن كالقبور عندما تنفرد
لا اعرف
فأنا لا أحب السينما ولم اشاهد كبارية ،أو البيبي دول ومن غير المنتظر أن اشاهدهم
ولكنى اتنفس هواءا نقيا ، متاح لكل الناس وكل الناس لديهم نفس القدرة على التنفس
تحياتي
كتير اوى قالولى ان فيلم كباريه حلو
لازم اشوفه فعلا ..
صباح الخير ..سمراء
طرح جيد لهذه الموروثات الخاطئة التى يجب ان تكون لدينا خطة فى المستقبل للتصدى لها وهذا ما أكدت عليه فى وجهة نظرى الخاصة بمدونتى والتى تحمل عنوان
حديث المسلمين والمسيحين
ودائما وانا أسير وفق هذا المنهج بأن الوطن لا يسع غير اناس تتعامل مع بعضها بإنسانية
كما أدعوك لقرأة وجهة نظر أخرى بمدونتى تحت عنوان
(أنا وصديقتى)
وشكرا لك
بكل الحب والاحترام
ادعوك لمتابعة الحلقة الرابعة من حكاية عمى رمزى وعم عمارة فى الحارة
تعالوا نسمع ونشوف العفاريت بتقول ايه عن الحارة
مع خالص تحياتى
تحياتي
طبعا الاولاد فهموا فهم خاطيء..او ان الاباء لم يعطوا معلومة صحيحة...
نعم كلنا متساويين كبشر....لكن قد نكون مختلفين في العقيدة...و هذا ليس نقصا او قصورا في الاخر....لكن الله انعم
علينا بنعمة الاختيار ...فكل منا قد اختار ما يري انه صواب...
نعم كلنا متساويين في الحقوق و الواجبات
رغم اختلاف عقيدتنا...لان العقيدة لله ، اما اعمالنا في الحياة الدنيا فهي تخص
المجتمع ككل.
تحياتي و تقديري
Post a Comment